Listo de ĉiuj partoj ⇐ Al la antaŭa parto Al la posta parto ⇒
La bazan tekston origine enkomputiligis Flandra Esperanto-Ligo
Kreis la Esperantan tekston: diversaj personoj
Proksimuma verkojaro: 2012-2018
La artikoloj origine aperis en Monato: http://www.esperanto.be/fel/mon/.
La artikoloj havas ĉi tie "(xml:)id"-atributon ("monato-2012-010403" ĝis "monato-2018-012399"), kies cifera parto egalas al la jaro de publikigo kaj la numero de la artikolo.
Samseksemon kontraŭleĝigas nova leĝo aprobita de la niĝeria senato. Samseksemuloj riskos 14 jarojn en prizono, se la leĝo estos aprobita ankaŭ de la ĉambro de reprezentantoj kaj ricevos, kiel atendite, la subskribon de la prezidanto.
Reagis diversmaniere niĝerianoj en- kaj ekster-landaj. En Novjorko gejoj niĝeriaj protestis antaŭ la konsulejo, postulante, ke la registaro nuligu la leĝon.
Sed enlande preskaŭ ĉiu subtenis la novan leĝon. La ministro pri informado kaj komunikado, Labaran Maku, opiniis, ke la registaro protektu la kulturon kaj valorojn de Niĝerio.
Ekzistas, laŭ Maku, kultura barilo inter Eŭropo, Usono kaj Afriko. Tio, kio eksterlande normalas, povas ofendi afrikajn kulturon kaj moron, diris la ministro.
Kontraŭ la leĝo protestis Usono, Britio kaj aliaj eŭropaj landoj. Tamen la ministro insistis, ke, dum ili ja rajtas protesti, sendependa ŝtato kiel Niĝerio ankaŭ rajtas krei siajn leĝojn.
Princo Henriko Oguinye/pg