Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Artikoloj el Monato

La bazan tekston origine enkomputiligis Flandra Esperanto-Ligo

Kreis la Esperantan tekston: diversaj personoj

La unuaj 216 artikoloj estas ĉerpitaj el la TTT-ejo de Monato: http://www.esperanto.be/fel/mon/. La postaj 1028 artikoloj devenas de la kolekto "monato3.tar.gz" enretigita de Edmundo Grimley-Evans: http://homepage.ntlworld.com/edmund.grimley-evans/tekstaroj.html.

La artikoloj el "monato3.tar.gz" estis en pluraj diversaj formoj, kaj devis esti sufiĉe multe prilaboritaj. Verŝajne ne ĉiam temas pri la definitiva formo, kiun la artikolo havis, kiam ĝi aperis en Monato. Povas eĉ esti, ke en iuj okazoj la artikolo finfine tute ne aperis en la gazeto. Iafoje povas esti, ke aperas ĉi tie tekstopartetoj, kiuj estis nuraj notoj inter la redaktantoj, kaj kiuj neniam estis intencitaj por publikigo. Ialoke testopartetoj estas forigitaj, kiuj ŝajne havis sencon nur kune kun (mankantaj) akompanaj diagramoj, bildoj aŭ tabeloj.

La artikoloj el "monato3.tar.gz" havas ĉi tie "(xml:)id"-atributon ("monatotri-001000" ĝis "monatotri-007999"), kies cifera parto egalas al la artikolnumero en la origina kolekto.

Proksimuma verkojaro: 1997-2003

BALKANIO

Balkana konferenco certigis 2,4 miliardojn da eŭroj

Per promeso disponigi 2,4 miliardojn da eŭroj finiĝis en Bruselo la unua konferenco pri financado de la Stabilecpakto por Sudorienta Eŭropo.

La partoprenantoj (la G8-ŝtatoj, Eŭropa Unio, Monda Banko kaj aliaj internaciaj institucioj, entute reprezentantoj de 44 landoj kaj 36 internaciaj organizaĵoj) provizis la tiel nomatan rapidstartan pakaĵon per la necesaj monrimedoj.

Bodo Hombach [hombaĥ], kunordiganto de la Stabilecpakto, fine de la konferenco konkludis ke la rezultoj superis ĉiujn prognozojn. Celo de la konferenco estis disponigi almenaŭ 1,8 miliardojn da eŭroj por Balkanio.

Dum unu jaro per tiuj monrimedoj oni akcelos la konstruon de substrukturo kaj la kreadon de sekureco, kiuj kontribuu al la reveno de la fuĝintoj kaj la estigo de demokratiaj kondiĉoj. Laŭ Hombach plej urĝaj estas sekureco kaj demokratiigo. Poste venos vico da klerigaj kaj repacigaj programoj.

La kreditojn oni rezervis por realisme ellaboritaj projektoj. Ekzemple, la nova ponto super Danubo inter Rumanio kaj Bulgario, kiun oni ofte menciis dum la konferenco, kostos entute 180 milionojn da eŭroj. Tamen por la unua jaro estos disponigitaj nur 5 milionoj.

La kontrolado de la efektivaj elpagoj estas submetita nun al laborgrupo de G8, EU, la financaj institucioj kaj ĉiuj kreditricevontaj landoj. Laŭ eldiro de Hombach, la premo sur li mem kaj sur ĉiuj partneroj pro tio estas tro granda. La sekva fazo de la projektoj en Balkanio komenciĝos nur kiam la unua fazo estos sukcese finita. Pro tio la dato de nova konferenco nun ne povas esti difinita.

Evgeni GEORGIEV

G7, G8 kaj G77

G7 aŭ G8 estas grupo de la plej riĉaj landoj, kiu de tempo al tempo kunvenas por diskuti pri aktualaj problemoj. Origine, en 1975, estis nur 6: Britio, Francio, Germanio, Italio, Japanio kaj Usono. En 1976 aldoniĝis Kanado kaj efektive estis G7. Ekde 1977 ankaŭ la prezidanto de la Eŭropa Komisiono kundiskutas kaj ekde 1994 (sed ne ĉiam) la prezidento de Rusio.

Ekzistas ankaŭ G77. Ĝi ekde 1967 grupigas la plej malriĉajn landojn. Nun estas 133 membroj. G77 lastfoje kunvenis meze de aprilo 2000 en Havano, Kubo.

rr