Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Artikoloj el Monato

La bazan tekston origine enkomputiligis Flandra Esperanto-Ligo

Kreis la Esperantan tekston: diversaj personoj

La unuaj 216 artikoloj estas ĉerpitaj el la TTT-ejo de Monato: http://www.esperanto.be/fel/mon/. La postaj 1028 artikoloj devenas de la kolekto "monato3.tar.gz" enretigita de Edmundo Grimley-Evans: http://homepage.ntlworld.com/edmund.grimley-evans/tekstaroj.html.

La artikoloj el "monato3.tar.gz" estis en pluraj diversaj formoj, kaj devis esti sufiĉe multe prilaboritaj. Verŝajne ne ĉiam temas pri la definitiva formo, kiun la artikolo havis, kiam ĝi aperis en Monato. Povas eĉ esti, ke en iuj okazoj la artikolo finfine tute ne aperis en la gazeto. Iafoje povas esti, ke aperas ĉi tie tekstopartetoj, kiuj estis nuraj notoj inter la redaktantoj, kaj kiuj neniam estis intencitaj por publikigo. Ialoke testopartetoj estas forigitaj, kiuj ŝajne havis sencon nur kune kun (mankantaj) akompanaj diagramoj, bildoj aŭ tabeloj.

La artikoloj el "monato3.tar.gz" havas ĉi tie "(xml:)id"-atributon ("monatotri-001000" ĝis "monatotri-007999"), kies cifera parto egalas al la artikolnumero en la origina kolekto.

Proksimuma verkojaro: 1997-2003

HUNGARIO

Servico de Sevso

Procesas tri ŝtatoj en Usono por arkeologia trezoro, kiu originis en Hungario, kaj kiu aperis lastatempe en la nigra merkato. Temas pri arĝenta servico konsistanta el kruĉoj, vazoj, ujoj kaj teleroj. La origina posedanto estis Sevso [seuso], romia riĉulo loĝanta ĉe la lago Balatono. Lia nomo estas surskribita sur telero. Ĉiu ero estas majstraĵo kun apenaŭ taksebla valoro. Kelkaj hungaroj diras, ke la servico valoras pli ol la hungara ora krono.

Ŝajnas, ke en 1975 juna amatora arkeologo trovis la servicon ĉe Balatono sed ne taksis ĝin valora. Li kontaktiĝis kun cigano, kiu supozis la trezorojn stano kaj interesiĝis nur pri la kupra kaldrono, en kiu la servico troviĝis. Poste, iom mistere, la junulo mortis. Laŭ polica raporto okazis sinmortigo: nun oni kredas la junulon murdita.

Brita lordo

Lastatempe kelkaj arĝentaĵoj aperis ĉe la aŭkciista firmao Sotheby en Londono, kie ilin akiris brita lordo. Tiu aĉetis la valoraĵojn surbaze de dokumentoj originintaj en Libano kaj laŭŝajne legitimantaj posedorajton. Intertempe Kroatio kredigis, ke la trezoroj troviĝis en domo de la iama prezidanto Tito.

Do en Nov-Jorko komenciĝis jur-proceso inter Hungario, Libano kaj Kroatio por decidi pri aparteneco. Aktuale la servico, gardata en banko, estas nenies. Sendube Hungario pagus grandan sumon por akiri la restantajn servicerojn, kiuj verŝajne ankoraŭ cirkulas en la nigra merkato.

Karlo JUHÁSZ