Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Artikoloj el Monato

La bazan tekston origine enkomputiligis Flandra Esperanto-Ligo

Kreis la Esperantan tekston: diversaj personoj

La unuaj 216 artikoloj estas ĉerpitaj el la TTT-ejo de Monato: http://www.esperanto.be/fel/mon/. La postaj 1028 artikoloj devenas de la kolekto "monato3.tar.gz" enretigita de Edmundo Grimley-Evans: http://homepage.ntlworld.com/edmund.grimley-evans/tekstaroj.html.

La artikoloj el "monato3.tar.gz" estis en pluraj diversaj formoj, kaj devis esti sufiĉe multe prilaboritaj. Verŝajne ne ĉiam temas pri la definitiva formo, kiun la artikolo havis, kiam ĝi aperis en Monato. Povas eĉ esti, ke en iuj okazoj la artikolo finfine tute ne aperis en la gazeto. Iafoje povas esti, ke aperas ĉi tie tekstopartetoj, kiuj estis nuraj notoj inter la redaktantoj, kaj kiuj neniam estis intencitaj por publikigo. Ialoke testopartetoj estas forigitaj, kiuj ŝajne havis sencon nur kune kun (mankantaj) akompanaj diagramoj, bildoj aŭ tabeloj.

La artikoloj el "monato3.tar.gz" havas ĉi tie "(xml:)id"-atributon ("monatotri-001000" ĝis "monatotri-007999"), kies cifera parto egalas al la artikolnumero en la origina kolekto.

Proksimuma verkojaro: 1997-2003

Du patroj interparolas.

“Nia Marinjo vojaĝis al Usono por studi. Ho ve! Nun, legante ŝian leteron ni tuj bezonas vortaron.” “Ne plendu!” respondas la alia patro. “Ankaŭ nia Karlo forvojaĝis al Usono. Se li skribas leteron al ni, ni tuj bezonas nian banklibreton.”

En trinkejo

“Vi aspektas laca, Janoso. Ĉu vi ne bone dormis?” “Sincere dirite, ne! Post la transloĝiĝo de mia edzino mi maldormas ĉiunokte.” “Mi kompatas vin, Janoso, sed ŝin mi neniam trovis aminda. Forgesu ŝin!” “Ne eblas. Tiu virinaĉo forportigis mian ununuran komfortan liton.”

Inter geamikoj

Mi aŭdis, ke ĉiu kvara homo suferas pro mensaj perturboj. Miaj tri geamikoj estas tute sanaj. Ĉu mi nun konsultu kuraciston?

El redakcia leterkesto:

“Kial mia fianĉo ĉiam fermas siajn okulojn, kiam li kisas min?” “Se vi sendos vian foton al la redakcio, ni pli facile povos respondi la demandon.”

Ĉe floristo

“Ĉu vi havas karnovorajn plantojn?” “Certe. Kiom grandan vi deziras?” “Hm, ĝi estos donaco al mia bopatrino, kiu pezas ĉirkaŭ 85 kg.”

Hejme

La edzo fiere vokas sian edzinon, kiu kutimas riproĉi lin pro mallerteco en praktikaj laboroj: “Venu vidi, kiom bele aspektas la nova murpapero en la salono! Vi devas agnoski, ke mi sukcesis surglui ĝin sen eĉ unu faldeto, ĉu ne?” La edzino longe rigardas ĉirkaŭ si kaj poste rimarkigas: “Jes, vere, sed mi ne plu vidas la pordon de la dormoĉambro. Antaŭe ĝi estis tie.”

Rekordo

Tri maristoj parolas pri siaj amikinoj “Mi havas karulinon en ĉiu havenurbo”, diras la unua. “Kaj mi sur ĉiu kajo”, fanfaronas la dua. “Ankaŭ mi, kaj miaj amantinoj naĝas renkonte al mi, kiam ili ekvidas mian ŝipon”, aldonas la tria.

En kongresurba parko

Maljuna vira kongresano sidas sur verda benko kaj larmegoj fluadas laŭ lia blanka barbo. Alproksimiĝas samideano kaj ĝentile demandas, kial li ploregas. “Ho! Hieraŭ dum la balo okazis miraklo. Juna belulino fulme enamiĝis al mi kaj ni decidis kune ekskursi kaj geedziĝi poste.” “Gratulon, sinjoro, sed kial vi nun ploras? Ĉu vi subite malsaniĝis?” “Ne, ne, sed mi ne povas memori, kiun ekskurson ni elektis, kaj mi eĉ ne demandis ŝian naciecon aŭ kongresan numeron!”

Pastro en la sakristio:

“Mi ĉiam esperis, ke ankaŭ la malriĉuloj venos al la meso. Enrigardante la almozosakon mi rimarkas, ke nur ili venadas.”

Dum matenmanĝo

“Ĉu vi ion diris, kara?” “Jes. Antaŭ du tagoj.”

En lernejo

Petro revenas al la klaso post malsano kaj la instruisto demandas, kiom longe li forestis. Petro respondas: “Ekde la dua mondmilito.”

En aŭtobuso

Emerita instruisto demandas etulinon, ĉu ŝi jam frekventas la lernejon. “Jes. De du jaroj”, respondas la knabineto. “Kaj mi frekventadis la lernejon dum 30 jaroj”, aldonas la eksinstruisto kun fiero. “Certe vi estas stulta”, serioze konkludas la etulino.