Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Artikoloj el Monato

La bazan tekston origine enkomputiligis Flandra Esperanto-Ligo

Kreis la Esperantan tekston: diversaj personoj

La unuaj 216 artikoloj estas ĉerpitaj el la TTT-ejo de Monato: http://www.esperanto.be/fel/mon/. La postaj 1028 artikoloj devenas de la kolekto "monato3.tar.gz" enretigita de Edmundo Grimley-Evans: http://homepage.ntlworld.com/edmund.grimley-evans/tekstaroj.html.

La artikoloj el "monato3.tar.gz" estis en pluraj diversaj formoj, kaj devis esti sufiĉe multe prilaboritaj. Verŝajne ne ĉiam temas pri la definitiva formo, kiun la artikolo havis, kiam ĝi aperis en Monato. Povas eĉ esti, ke en iuj okazoj la artikolo finfine tute ne aperis en la gazeto. Iafoje povas esti, ke aperas ĉi tie tekstopartetoj, kiuj estis nuraj notoj inter la redaktantoj, kaj kiuj neniam estis intencitaj por publikigo. Ialoke testopartetoj estas forigitaj, kiuj ŝajne havis sencon nur kune kun (mankantaj) akompanaj diagramoj, bildoj aŭ tabeloj.

La artikoloj el "monato3.tar.gz" havas ĉi tie "(xml:)id"-atributon ("monatotri-001000" ĝis "monatotri-007999"), kies cifera parto egalas al la artikolnumero en la origina kolekto.

Proksimuma verkojaro: 1997-2003

INTERVJUO

Finfine oni povas diboĉi sen pento

Fama universala geniulo profesoro Doktoro Ruĝnazul, konata pro siaj furoraj prelegoj pri sciencaj temoj, dokumentitaj en La KancerKliniko, ĵus inventis tute novan aparaton por ebriuloj. Ni demandis lin pri tio.

Profesoro, vi volas savi ebriulojn. Kiel?

Ruĝnazul: Tre simple. Per aparato, kiun ni nomas alkohol-blokilo.

Ĉu ĝi do malhelpas trinkadon de alkoholaĵoj?

Ruĝnazul: Tute male, ĝi ebligas diboĉi kaj drinki sen riskaj konsekvencoj.

Sed ĉu alkoholaĵoj ne damaĝas la sanon?

Ruĝnazul: Pri tio mi scias nenion; mi drinkas de 92 jaroj kaj ankoraŭ estas tute sana.

Jes, kaj ni komplimentas. Sed ne ĉiuj estas tiom geniaj ebriuloj, ĉu ne?

Ruĝnazul: Vi devias kaj maltrafas la temon. Mi parolas pri homo, kiu estas ebria kaj posedas aŭtomobilon, per kiu postdiboĉe li volas veturi hejmen.

Ĉu tio ne estas tre danĝera?

Ruĝnazul: Ĝuste. Kaj tiun ĉi danĝeron evitas mia aparato.

Kiel ĝi funkcias?

Ruĝnazul: Kiam vi eksidas por ekstiri, vi devas unue blovi en tubeton en nia aparato. Se vi estas tro ebria por stiri la aŭton, la elektronika aparato blokas la veturilon kaj vi ne povas starti.

Sed kiel do mi venu hejmen tiuokaze?

Ruĝnazul: Tute ne. Vi povas aŭ dormi en la aŭtomobilo aŭ reiri al la drinkejo por daŭrigi diboĉadon. Kiel ajn, vi ne devos tranokti en polica arestejo, kaj tio ja estas granda avantaĝo, ĉu ne?

Kiom kostas via aparato?

Ruĝnazul: 1600 eŭrojn.

Ĉu tio ne estas iom kosta?

Ruĝnazul (furioze): Kosta! Kosta! Kompreneble tiom genia aparato ne estas produktebla kaj aĉetebla kontraŭ kelkaj arakidoj! Imagu, kiom da miloj da eŭroj por punpago vi devas elspezi, se ebria vi estas kaptita de polico, aŭ se vi frakasas vian aŭton ĉe arbo aŭ muro, ĉar la asekuro ne pagas al ebriuloj!

Tamen, ĉu ne estus pli prudente kiel aŭtomobilisto tute ne trinki alkoholaĵon?

Ruĝnazul: Vere stulta argumento! Ĉu vi volas limigi la demokratan liberecon de homo, drinki laŭplezure, nur ĉar li posedas aŭton?

Ho, pardonu! Ni dankas pro la intervjuo. Je via sano, profesoro Ruĝnazul!