Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Artikoloj el Monato

La bazan tekston origine enkomputiligis Flandra Esperanto-Ligo

Kreis la Esperantan tekston: diversaj personoj

La unuaj 216 artikoloj estas ĉerpitaj el la TTT-ejo de Monato: http://www.esperanto.be/fel/mon/. La postaj 1028 artikoloj devenas de la kolekto "monato3.tar.gz" enretigita de Edmundo Grimley-Evans: http://homepage.ntlworld.com/edmund.grimley-evans/tekstaroj.html.

La artikoloj el "monato3.tar.gz" estis en pluraj diversaj formoj, kaj devis esti sufiĉe multe prilaboritaj. Verŝajne ne ĉiam temas pri la definitiva formo, kiun la artikolo havis, kiam ĝi aperis en Monato. Povas eĉ esti, ke en iuj okazoj la artikolo finfine tute ne aperis en la gazeto. Iafoje povas esti, ke aperas ĉi tie tekstopartetoj, kiuj estis nuraj notoj inter la redaktantoj, kaj kiuj neniam estis intencitaj por publikigo. Ialoke testopartetoj estas forigitaj, kiuj ŝajne havis sencon nur kune kun (mankantaj) akompanaj diagramoj, bildoj aŭ tabeloj.

La artikoloj el "monato3.tar.gz" havas ĉi tie "(xml:)id"-atributon ("monatotri-001000" ĝis "monatotri-007999"), kies cifera parto egalas al la artikolnumero en la origina kolekto.

Proksimuma verkojaro: 1997-2003

Dividi en sekciojn

Kiel savi la germanan kulturon

Germana deputito Frito Graso havas bonan ideon, kiel savi la propran kulturon. Ni parolis kun li pri tiu ĉi nova iniciato.

Sinjoro deputito, vi kritikas la gastronomion en Germanio. Kion vi riproĉas?

Graso: Nu, vidu mem, promenante tra niaj urboj, ĉu vi trovas iun alian ol eksterlandan gastejon? Vi povas manĝi itale, turke, greke, jugoslave, sed ne germane.

Kion vi proponas?

Graso: Ne proponas sed postulas. Ĉiu restoracio devas oferti minimume unu germanan specialaĵon, ekzemple la tipan porkpiedon kun terpomkaĉo.

Sed ekzemple en turka restoracio tio ne eblas, ĉar islamanoj rajtas eĉ ne tuŝi porkviandon.

Graso: Tio ne estas nia problemo. Turkoj povas dungi neislamajn kuiristojn.

Kaj kiel vi volas certigi, ke oni plenumos vian postulon?

Graso: La leĝo, kiun mi ellaboras, enhavos punpagon por tiuj restoracioj, kiuj ne ofertas minimume unu germanan manĝaĵon.

Do iuspeca pic-imposto?

Graso: Ne temas nur pri picejoj, sed kiel mi diris pri ĉiuj negermanaj restoracioj. Do eble pli ĝuste oni povos paroli pri pork-imposto.

Sed ĉu vere ĉiuj germanoj volas manĝi porkaĵon en negermana restoracio?

Graso: Ne temas pri tio, ĉu ili volas aŭ ne, ili devas, se ni ne komplete perdu nian kulturan identecon.

Ĉu tio validos ankaŭ por la usona hamburgaĵo?

Graso: Ne, ĉar kiel jam indikas la nomo, temas ja pri tipe germana manĝaĵo. Hamburgo estas germana, ne usona urbo.

Kio estas pri vegetaranoj?

Graso: Kio estas tio?

Homoj, kiuj ne manĝas viandon.

Graso: Hm. Nu, ili ricevu duoblan porcion da terpomkaĉo.

Ni dankas pro la intervjuo kaj deziras sukceson al via leĝiniciato.