Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Artikoloj el Monato

La bazan tekston origine enkomputiligis Flandra Esperanto-Ligo

Kreis la Esperantan tekston: diversaj personoj

La unuaj 216 artikoloj estas ĉerpitaj el la TTT-ejo de Monato: http://www.esperanto.be/fel/mon/. La postaj 1028 artikoloj devenas de la kolekto "monato3.tar.gz" enretigita de Edmundo Grimley-Evans: http://homepage.ntlworld.com/edmund.grimley-evans/tekstaroj.html.

La artikoloj el "monato3.tar.gz" estis en pluraj diversaj formoj, kaj devis esti sufiĉe multe prilaboritaj. Verŝajne ne ĉiam temas pri la definitiva formo, kiun la artikolo havis, kiam ĝi aperis en Monato. Povas eĉ esti, ke en iuj okazoj la artikolo finfine tute ne aperis en la gazeto. Iafoje povas esti, ke aperas ĉi tie tekstopartetoj, kiuj estis nuraj notoj inter la redaktantoj, kaj kiuj neniam estis intencitaj por publikigo. Ialoke testopartetoj estas forigitaj, kiuj ŝajne havis sencon nur kune kun (mankantaj) akompanaj diagramoj, bildoj aŭ tabeloj.

La artikoloj el "monato3.tar.gz" havas ĉi tie "(xml:)id"-atributon ("monatotri-001000" ĝis "monatotri-007999"), kies cifera parto egalas al la artikolnumero en la origina kolekto.

Proksimuma verkojaro: 1997-2003

Dividi en sekciojn

ĈINIO

Dekono de la familioj baldaŭ aĉetos aŭton

Decembre de 2000, en pli ol 20 urboj grandaj kaj mezgrandaj, la Ĉina Konsumanta Asocio faris enketon pri aŭtoj kaj familioj. En ĉiu urbo la asocio elektis 500 enketotajn familiojn kaj petis ilin detale respondi al la donita demandilo. La rezulto de la enketo aperis en pluraj gravaj ĵurnaloj en la komenco de februaro.

La asocio esperas ke per la rezulto produktantoj kaj komercantoj de aŭtoj informiĝu pri la ŝanĝiĝoj de la ĉina aŭtomerkato dum la venontaj kvin jaroj.

Multaj senaŭtuloj havas konduklicencon

Anticipe oni difinis ke inter la 500 enketotaj familioj 100 estas aŭtohavaj kaj 400 senaŭtaj. 81 % de la demanditaj personoj aĝas ne super 45 jaroj. La enketo montris ke, ĉar inter la senaŭtaj konsumantoj 31 % jam havas konduklicencon, en la ĉina aŭtomerkato estas kaŝita granda latenta forto.

Inter la enketitaj familioj tiuj, kiuj pretigis sin aĉeti aŭton en 2001 okupas dekonon. 16 % planas aĉeti aŭton en 2002, 70 % de 2003 ĝis 2005. El tio videblas, ke dum 2005-2010 en Ĉinio okazos la alta tajdo de privata aĉeto de aŭtoj.

Al la demando pri la origino de la aĉetota aŭto, 13 % deklaris emi posedi aŭton produktitan de Ĉinio. Ju pli demanditoj estas malgrandaĝaj, des pli ili preferas aŭton importitan. Rilate al koloro kaj tipo, plejparto opinias ke aŭto devas esti oportuna al praktika vivo. 55 % de la aĉetontoj preferas dupordan limuzinon. La ŝatataj koloroj laŭvice estas nigra, blanka, ruĝa, grizflava, blua kaj malhelverda.

Kostoj gravas

Kiam oni aĉetas aŭton por familia uzado ĉefe estas konsiderataj prezo, servado post vendo, benzinkonsumo kaj fabrikmarko. Nur 38 % ne volas pruntepreni monon de banko por aĉeti aŭton. 89 % el la enketitoj, kiuj havas aŭton, estas kontentaj aŭ principe kontentaj pri sia aŭto. La kritikoj ĉefe koncentriĝas je benzina ekonomieco, komforto kaj prilabora precizeco.

La prezo de aŭto kaj la kromaj kostoj estas granda malhelpo al la disvolviĝo de la aŭtomerkato. 73 % ne tro kredas la informojn de la aŭtoreklamo, ĉar ĉinaj komercistoj ofte teksas mensogojn por beligi siajn varojn. Nuntempe, la plej ŝatata ĉina marko estas Santana, de Ŝanhaja Aŭtofabriko.

MU Binghua