Listo de ĉiuj partoj ⇐ Al la antaŭa parto Al la posta parto ⇒
La bazan tekston origine enkomputiligis Flandra Esperanto-Ligo
Kreis la Esperantan tekston: diversaj personoj
Proksimuma verkojaro: 2012-2018
La artikoloj origine aperis en Monato: http://www.esperanto.be/fel/mon/.
La artikoloj havas ĉi tie "(xml:)id"-atributon ("monato-2012-010403" ĝis "monato-2018-012399"), kies cifera parto egalas al la jaro de publikigo kaj la numero de la artikolo.
En Romo 54-jara loka rabisto eniris kun falsa bombo en poŝtan oficejon (ili funkcias en Italio simile al bankoj), sed ne sukcesis konduki la rabon al ĝia fino.
Antaŭ la okuloj de policanoj, vokitaj de malvarm-sanga oficistino kaj tuj alkurintaj, la viro fakte ne eltenis la streĉon kaj havis infarkton.
Tial la ĝendarmoj, aŭ pli precize la karabenistoj (itallingve “carabinieri”), improvize ekrolis kiel flegistoj. Anstataŭ lin aresti kaj submeti al pridemandado, ili portis lin al la plej proksima malsanulejo. Kuracistoj urĝe operaciis kaj tiel savis la vivon de la fripono.
La paciento tutkore dankis al la karabenistoj, sed baldaŭ komprenis, ke la afero por li ne tiom feliĉe finiĝos. Apenaŭ la rabisto, taŭga kiel ĉefrolulo de humuraĵo aŭ de komika filmo, estos konvaleskinta, atendos lin proceso pro la raboprovo.
Roberto Pigro