Listo de ĉiuj partoj ⇐ Al la antaŭa parto Al la posta parto ⇒
La bazan tekston origine enkomputiligis Flandra Esperanto-Ligo
Kreis la Esperantan tekston: diversaj personoj
Proksimuma verkojaro: 2012-2018
La artikoloj origine aperis en Monato: http://www.esperanto.be/fel/mon/.
La artikoloj havas ĉi tie "(xml:)id"-atributon ("monato-2012-010403" ĝis "monato-2018-012399"), kies cifera parto egalas al la jaro de publikigo kaj la numero de la artikolo.
Specialistoj ĉe Imunologia Molekula Centro (IMC) en Kubo antaŭ nelonge kreis Cimavax-EGF, terapian vakcinon kontraŭ progresinta pulma kancero. Oni jam testis ĝin ĉe pli ol 5000 malsanuloj kaj la rezultoj atingitaj estas tre favoraj.
Multajn oni jam klopodis trakti per ĉi tiu nova kuba vakcino. Ĝi ŝajnas efiki kontraŭ plej rezistaj kaj kompleksaj formoj de pulma kancero: ĝi ne vere kuracas aŭ malaperigas ĝin, sed malrapidigas la disvolviĝon de la malsano. Laŭ asertoj de fakuloj de IMC, la aplikado montris ĝis nun rezultojn kuraĝigajn.
Tiel eblas iel haltigi la plimultiĝon de karcinomo ĉe la ĉefa organo de hom-spirado kaj sekve plilongigi la vivon de malsanuloj. La vakcino cetere prezentas toksecon aparte malaltan kaj estas bone tolerata. Fakte ĝi ne okazigas la malagrablajn kromefikojn, kiuj kutime aperas pro kemiterapio kaj radioterapio.
La doktorino pri sciencoj Tania Crombet Ramos, esploristo ĉe IMC, informis, ke la vakcinon oni enigas per intramuskola vojo kaj ke ĝia nivelo de sekureco estas treege alta. Tiamaniere oni povas plibonigi la vivkvaliton de pacientoj rimarkinde kaj precipe senriske.
Cimavax-EGF estis unuafoje registrita en 2008 en Kubo. Ĝin registris pluraj landoj, kiel Argentino, Kolombio, Peruo, Paragvajo, Bosnio-Hercegovino kaj Kazaĥio. Rilate al ĝia intelekta proprieto, la disdonado de tiu ĉi esperodona medikamento baziĝas sur du malsamaj patentoj, unu el kiuj validos en 80 landoj ĝis la jaro 2028, inkluzivante ŝtatojn de EU kaj Usonon. Nuntempe okazas diversaj klinikaj testoj de Cimavax-EGF ĉe institucioj en Eŭropo, Azio kaj Usono. En Usono la testado okazas en la esplorcentro Roswell Park Cancer Institute de Nov-Jorko.
Kiel substrekis Ramos, la venontaj projektoj pri la vakcino konsideros la plenumadon de nova esploro, per kiu oni provos taksi la rezultojn de ĝia utiligo kombine kun diversaj aliaj kuraciloj, mem registritaj kontraŭ pulma kancero. Oni volas tiamaniere kompreni, ĉu eblas ĝin uzi ankaŭ kontraŭ aliaj malignaj tumoroj kaj dum pli fruaj fazoj de la malsano.
IMC estis fondita en 1994 de la tiama prezidento de Kubo, Fidel Castro Ruz. Ĝi esence intencas produkti novajn medikamentojn traktontajn kaj kanceron kaj tiel nomatajn aŭtoimunajn malsanojn.
Juan Carlos Montero Medina
korespondanto de Monato en Kubo