Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Kontakto 2011-2019

La bazan tekston origine enkomputiligis Rogener Pavinski

Proksimuma verkojaro: 2011-2019

Kreis la Esperantan tekston: diversaj personoj

La artikoloj origine aperis en Kontakto: http://kontakto.tejo.org.

Tiel la mond’...

...identas. T-ĉemizo estas mirinda maniero montri sian bruston — kaj liveri mesaĝojn. Iuj homoj iĝas vivantaj afiŝtabuloj por frazoj en lingvoj nekomprenataj, aliaj elektas brustofrazon tre enhavo-konscie.

De kelkaj semajnoj mi estas fiera posedanto kaj portanto de Kontakto-ĉemizo, kaj ĝi iĝis unu el miaj plej ŝatataj (korpo)kovriloj. Ĉar mi ne povas ĉarmi per ĝi ĉiutage (des malpli en la nuna insiste vintraĉa klimato), mi surmetas foje ankaŭ ion alian... interalie ekvacion pri mia identeco.

34% hungaro, 33% franco, 33% esperantisto, 0% rassist = 100% Lëtzebourg — anoncas tiu mia T-ĉemizo. La lastaj du vortoj signifas — se vi ne divenis — “rasisto” kaj “Luksemburgio” en la lingvo de mia loĝlando. Loka iniciato (makingluxembourg.lu) ebligas cifere difini sian identecon, kun la gvida ideo ke esti centprocente luksemburgia signifas ĝuste tion, diversecon kaj malrasismon.

Kiam mi “komponis” la ekvacierojn, mi kompreneble longe hezitis: kiu mia identero ricevu pli da procentoj? Finfine, mi estas de ĉiam hungaro, eble 35 jarojn esperantisto, kaj nur lastatempe franco. Kaj ĉu la daŭro plej gravas? Aŭ la propra sento pri aparteno? Kaj kion pri mia(j) identeco(j) kiel patro, tradukisto, eksnederlandano, biciklemulo, leganto de Kontakto kotopo?

Tamen, tiu problemeto estas luksa zorgo kompare kun tio kion alfrontas, ekzemple, francoj kies prauloj naskiĝis eksterlande kaj kiuj deziras renovigi identigilon aŭ pasporton. Ekde la stulta striktiĝo de la leĝoj tiurilataj, homoj eĉ denaske ĉiusence kaj ĉiusente francaj povas trovi sin en Kafkeca situacio, devi pruvi al la franca burokratio ke iliaj geavoj ne fraŭde fariĝis francoj... Ĵus mi legis atestan libreton de la hungarida ĵurnalisto Michka Assayas pri tio — li atentigas ke principe eĉ la ŝtatprezidinto Sarkozy povas trafi tian identopruvan problemon!

Sed, finfine, kiu kaj kio difinas niajn identecojn? Mi ne scias. Sed ni certe ne lasu aliajn fari la difinon por ni.