Tekstaro de Esperanto

Demandite, la 16-an de aŭgusto [2002 -vl], de la ĵurnalo Yediot Aharonot, la israelia ministro pri defendo, Benjamin Ben Eliezer, koncedis ke ekzistas multe da “psikologia milito” dum tiu ĉi atenda periodo. “Ĉiumatene, kiam mi vekiĝas kaj aŭdas ĉiujn ĉi historiojn en la amaskomunikiloj pri la evoluo en Irako, mi ĵetas min sur miajn gazetojn. Ĉu eble mi forgesis ion? Mi trakuras la kolumnojn, kaj ĉio restas kiel antaŭe. Ne estas kialo por tiu timo.”

Pri la armado de s-ro Saddam Hussein, li daŭrigas: “Li ne havas atomarmilojn. Ni taksas ke li havas kemiajn armilojn kaj, eble, bakteriologiajn armilojn. Li havas da ili tre malmultajn. Kiom ni scias, li ne disponas pri multaj misiloj. Ni pensas ke li sukcesis kaŝi parton de sia kemia armilaro kaj de siaj bakteriologiaj kapoj. Ni kalkulas je tio kaj preparas nin. Sed ni estas tiom malproksimaj de tiu momento, ke la tuta ĉi histerio superfluas.”