Tekstaro de Esperanto

Antaŭ deko da jaroj, kiam estis bontone glosi pri la neinversigebla usona malaltiĝo, Joseph S. Nye antaŭdiris ke Usono restos en hegemonia pozicio, ĉar gi konservos, malgraŭ siaj ekonomiaj problemoj, sian potencan influon per la kulturo, la teknologio, ktp.* Denove kontraŭflue, Joseph Nye pledas, dum plena unuflankisma eŭforio, la koncertiĝon kaj la multflankismon.*

La doktrino de la registaro Bush estas efektive bazita sur la principo de “la preventa memdefendo unuflanke decidata”. La falkoj kavas militisman vizion pri la monda ordo. Ili asertas troviĝi ĉe la “realisma” flanko, kiu volas ke la militaj resursoj estu la esenca indikilo de potenco.

Laŭ tio, se “reĝimŝanĝo” en Irako nepras, do ne multe gravas ke la arabaj landoj kaj la eŭropaj aliancanoj kontraŭas. Kaj kiam temas pri la protokolo de Kioto, pri la internacia punkortumo aŭ pri la ĝeneva konvencio, Usono estas tiom certa pri sia bona rajto ke ĝi malmulte zorgas pri la internacia juro.

Joseph Nye, renoma universitatano, okupis gravajn postenojn en la departementoj defendo kaj eksteraj aferoj. Lia kritiko situiĝas en la tereno de pragmatismo kaj de defendo de la usonaj interesoj per multflanka aliro konsiderante la interesojn kaj zorgojn de la “internacia komunumo”. Nek la milita potenco de Usono nek la ukazoj influos la ekonomian kreskon, la malriĉecon, la medion aŭ la financajn aŭ migrajn fluojn.

I. W.