Tekstaro de Esperanto

KURAĜA EŬROPA NACIETO kiu defendas la esprim-liberecon; akceptema kaj tolerema popolo surprizita de barbarismo; reĝimo konsternita de perforta entrudiĝo de la religio en la politikan sferon: tiom da kliŝoj pri Danlando kiuj karakterizis la polemikojn de la lastaj semajnoj pri la karikaturoj de la profeto Mohamedo.

Necesas tamen forgrati la lakon por malkovri bildon tute alian ol tiujn naivajn. Ne nur estas la eklezio ne separita de la ŝtato, sed ekzistas ŝtat-religio, la luterana protestantismo, la pastroj estas ŝtatoficistoj, la lecionoj pri kristanismo estas devigaj en la lernejoj, ktp.*

La toleremo estas serioze difektita en lando kie la centra-dekstra plimulto regas danke al la apogo de ekstrem-dekstra organizo, la Partio de la Dana Popolo, kiu tute ne postrestas la francan Nacian Fronton. Kiel rimarkigas la ĵurnalisto Martin Burcharth, “Ni, la danoj, fariĝis pli kaj pli ksenofobaj. La publikigo de la karikaturoj havas malmulte por fari kun la volo aperigi debaton pri memcenzuro kaj esprim-libereco. Ĝi estas komprenebla nur en la klimato de esenca malamikeco kontraŭ ĉio islama ĉe ni.”*

Fine la taggazeto Jyllands-Posten, kiu aperigis la karikaturojn pri Mohamedo*, rifuzis, antaŭ kelkaj jaroj, publikigi karikaturon kiu montris la Kriston, kun la pikiloj de sia krono transformitaj en bomboj, atakante la klinikojn kiuj praktikas la memdecidan ĉesigon de gravedeco.

La gazetara libereco meritas defendon. Estas ne allaseble ataki konsulejojn aŭ ambasadejojn, eĉ malpli bruligi ilin. Jes, la komunikiloj devas defii la tabuojn, eĉ se oni pli kuraĝas kontesti la tabuojn de sia propra socio ol tiujn de la aliaj. Oni atendas do en Francio la karikaturojn — kaj la artikolojn — pri la mastroj de la gazetaro kiel Dassault, Bouygues aŭ Lagardère...

Alain GRESH.