Tekstaro de Esperanto

La egiptaj komunikiloj unuanime omaĝas la ĵurnaliston Mohamed Sid-Ahmed pot lia morto la 18-an de februaro 2006. Redaktisto ĉe la taggazeto Al Ahram, kunlaboranto de Le Monde diplomatique ekde marto 1972, li estis laŭ iuj ĉefartikoloj “granda ĵurnalisto”, por aliaj “granda politika pensisto”. Formita kiel politeĥnikisto, liaj analizoj estis ekvilibraj kaj sen ĉia dogmatismo; lia kuraĝo permesis al li defii la tabuojn, ataki antaŭjuĝojn kaj kliŝojn; aktivi favore al regulado de la israela-araba konflikto per intertraktado; li firme tenis siajn poziciojn de progresema opoziciulo sed lia ĝisosta honesteco gajnis al li la respekton de ĉiuj politikaj tendencoj, inkluzive de konservativuloj kaj islamistoj.

Mohamed Sid Ahmed estis rara fenomeno en la egipta politika pejzaĝo: devena de la monarĥista aristokrataro — lia patro, Abbas Sid-Ahmed Pacha, estis granda ter-proprietulo — li oferis riĉecon kaj privilegiojn fariĝante unu el la gvidantoj de la komunisma movado en la 1950-aj jaroj; li estis dum longaj jaroj en malliberejo sub la monarĥio kaj sub la respubliko; komence de la 1970-aj jaroj li estis unu el la fondintoj de la Progresema Kolektiĝo, organizo kiu grupigis marksistojn kaj maldekstrajn naseristojn. Liaj konvinkoj de juneco evoluis dum la jaroj, sed li neniam malkonfesis ilian substancon.

La skipo kaj la kunlaborantoj de Le Monde diplomatique prezentas siajn emociitajn kondolencojn al lia edzino kaj kunlaborantino, Maïssa Talaat, kaj ali iliaj tri infanoj.

Eric ROULEAU.