Tekstaro de Esperanto

LA ĈINA KOMUNISTA PARTIO (ĈKP) havas nun pli ol 70 milionojn da membroj. Ĝi konsistas el sufiĉe aĝaj homoj, kun alta eduknivelo, kaj ĉefe viroj: en 2006, 77% de ĝiaj membroj estis pli ol 35-jaraj; 80,9% estis viroj kaj 29% havis universitatan diplomon*. Oni rimarkas fortan proporcion de novuloj: en kvar jaroj, de 2002 al 2006, preskaŭ 12 milionoj da novuloj aliĝis*. Virinoj ŝajnas ne pli ol antaŭe interesi la komunistajn gvidantojn, sed la junularo fariĝis grava celtabulo de la aliĝkampanjoj; 80% de la novaj membroj estas malpli ol 35-jaraj*.

Tamen, ne ĉiu, kiu volas, eniras, selektado estas severa. En Shandong-universitato ekzemple, kie 91,0% de la unuaciklaj studentoj kandidatiĝis por la partio, nur 13,5% estis allasitaj. Kontraŭe, 40% de la duaciklaj studentoj estis akceptitaj*. Laŭ iuj studentoj, por sukcesi necesas esti diligenta studento, montri intereson por organizado de kolektivaj aktivaĵoj kaj havi facilecon por sociaj rilatoj. Tro originalaj vestaĵoj kaj nekonformaj sintenoj estas malkonsilindaj.

Aliĝkampanjo estis lanĉita ankaŭ direkte al la novaj sociaj kategorioj, aparte la dungitoj de la 600.000 eksterlandaj entreprenoj ekzistantaj en la lando*. La ĈKP jam havas 2,86 milionojn da membroj dungantoj kaj dungitoj de privataj entreprenoj, kaj 810.000 sendependajn entreprenistojn kiel membrojn*; 40% de la privataj individuaj entreprenestroj estas membroj de la ĈKP. “Nia celo, diras la parti-respondeculo de malgranda entrepreno, estas transformi ĝin en partion de mezaj klasoj (zhongchan jieceng), konsistantan el altnivelaj civitanoj: entreprenistoj, dungitoj kaj ŝtatfunkciuloj havantaj respondecojn, sed ankaŭ migraj laboristoj, kiuj montris siajn kvalitojn.”

Jean-Louis ROCCA