Tekstaro de Esperanto

Antaŭ la Tribunalo de Bobigny, la 17-an de januaro 2013, Air France estis akuzata pro diskriminado de pasaĝerino forigita la 15-an de aprilo 2012 el aviadilo flugonta al Tel Aviv. Kion ŝi kulpis? Ŝi nee respondis tiujn du demandojn: “ĉu vi havas israelan pasporton?” kaj “ĉu vi estas el juda religio?”

Ni memorigu la kuntekston. Centoj da eŭropaj aktivuloj deziris iri en Palestinon por esprimi sian solidarecon kun popolo vivanta sub okupado. Israelo, la “nura demokratio en Proksima Oriento” estis decidinta malpermesi al tiuj geaktivuloj aliron al sia teritorio kaj tiu de Palestino. Kunlaborintoj de la israela polico, la eŭropaj aviadil-kompanioj kaj registaroj kontribuis elserĉi la suspektatojn, de Parizo ĝis Berlino, kaj malhelpi ilin enaviadiliĝi.

Sed ĉi tiu kompliceco ne estis la kaŭzo de la proceso. Pli simple, temis pri scii, ĉu dungito de Air France rajtas demandi pri la religio de pasaĝero, kaj elaviadiligi lin pro la nura kialo, ke li ne estas judo. S-ro Jean-Charles Tréhan, direktoro delegito pri komunikado ĉe Air France, defendis sin, dirante, ke la demandoj estis formulitaj “laŭ peto de la israelaj regantoj”. Sed ĉu la kompanio rajtas, eĉ laŭpete de alia lando, malrespekti la francajn leĝojn pri diskriminado? Verdikto estos donita la 21-an de marto; la prokuroro jam subtenis la advokatojn de la plendanto por postuli kondamnon de Air France.

ALAIN GRESH