Tekstaro de Esperanto

Parto de unu teksto en kolekto de Esperantaj tekstoj

Listo de ĉiuj partoj  ⇐ Al la antaŭa parto  Al la posta parto ⇒ 

Le Monde diplomatique en Esperanto 2011-2013

La bazan tekston origine enkomputiligis Vilhelmo Lutermano

Kreis la Esperantan tekston: diversaj personoj

La artikoloj estas ĉerpitaj el la TTT-ejo de Le Monde diplomatique en Esperanto: https://eo.mondediplo.com.

Proksimuma verkojaro: 2011-2013

Ligilo al la origina teksto en “Le Monde diplomatique en Esperanto”

La “nekonata” artikolo, kiu ebligas al Usono spioni Interreton

Vaŝingtono (AFP)

En decembro kaj dum kelkaj horoj, la usonaj parlamentanoj debatis publike pri la leĝo, kiu reguligas la programon de gardado de Interreto, PRISM, kaj la informo pri tio, fare de Edward Snowden, kaŭzis planedvastan skandalon.

La principoj de tiu programo estis publike konataj jam de jaroj. Snowden, eksa subsekretario de la Agentejo pri Nacia Sekureco (NSA laŭ la angla), en la realo faris nenion pli ol malkaŝi al The Washington Post kaj al The Guardian la funkciadon de la programo, per kio li montris la facilecon, per kiu la NSA aliras la komunikaĵojn, kiuj okazas tra naŭ retejoj, interalie Google, Facebook kaj kelkaj apartenantaj al Mikrosofto.

“Ne nur la Kongreso estas respondeca, sed ankaŭ la justico devas permesi” la kontrolojn, diris vendrede la prezidanto Barack Obama.

La retejoj unuvoĉe malkonfirmis ke ili donis totalan “rektan aliron” al la usonaj spionoj, sed indikis, ke ili obeis la petojn de kunlaborado, kiujn la justico aprobis.

La leĝa bazo troviĝas en la artikolo 702 de la leĝo nomata FISA Amendment Act de la jaro 2008, kies validon la Senato etendis ĝis la jaro 2017 per tre ampleksa plimulto da voĉoj (73 kontraŭ 23) la 28-an de decembro.

Tiu normo estis voĉdonita por anstataŭigi kaj doni leĝecon al la programo de sekretaj subaŭskultadoj sen jura mandato sub la prezidanteco de George W. Bush post la atencoj de la 11-a de septembro 2001. Tiuj subaŭskultadoj, malkaŝitaj de The New York Times en la jaro 2005, estis poste metitaj sub la kontrolon de la Kongreso kaj de la justecaparato.

(Granma, 2013-06-12, laŭ AFP)