Listo de ĉiuj partoj ⇐ Al la antaŭa parto Al la posta parto ⇒
La bazan tekston origine enkomputiligis Vilhelmo Lutermano
Kreis la Esperantan tekston: diversaj personoj
La artikoloj estas ĉerpitaj el la TTT-ejo de Le Monde diplomatique en Esperanto: https://eo.mondediplo.com.
Proksimuma verkojaro: 2014-2016
Ligilo al la origina teksto en “Le Monde diplomatique en Esperanto”
La Programo de la Unuiĝintaj Nacioj pri Disvolvado (PUND) klasifikas Burkinon ĉe la 181-a rango (el 187) en la skalo de homa disvolvado*. Preskaŭ la duono de la enloĝantaro vivas per malpli ol 1,25 dolaro (1 eŭro) tage, la alfabetiga kvoto de la plenkreskuloj (pli ol 15-jaraj) estas sub 30% kaj tiu de la junuloj sub 40%. Tiuj junuloj estas pli ol 60% de la tuta loĝantaro. La mortokvoto de la subkvinjaruloj estas pli ol 10%, kaj la patrina mortokvoto estas 3 por mil, laŭ la PUND. El ĉirkaŭ 17 milionoj da loĝantoj, pli ol 1,3 miliono suferas pri nutra malsekureco, laŭ la Kunordiga Buroo de la homhelpaj aferoj de la Unuiĝintaj Nacioj*. Tamen Burkino, lando 274.000 kvadrat-kilometrojn vasta, havas riĉofontojn: la oro-eksportaĵoj estas 5% de la Malneta Enlanda Produkto (MEP)*, kaj la lando pluestas la ĉefa afrika eksportanto de kotono — kies mondaj kurzoj ja emas malaltiĝi.
Anne FRINTZ