Tekstaro de Esperanto

KUN ELDONKVANTO de miliono kaj duono da ekzempleroj, la germana gazeto Bild daŭrigas malnovan tradicion, kiun en 1974 la verkisto Henriko Bolo (germane: Heinrich Böll [hájnriĥ bol] priskribis en “La perdita honoro de Katarina Blum”*: la ĵurnalismon de fidenunco. Kulpa pro esti gastiginta viron serĉatan de la polico, la heroino vidas sian ekzistadon ruinigita per varbaĉa gazetaro submetita al la ordofortoj.

Kvardek tri jarojn poste, la 10-an de julio 2017, tagon post alfrontiĝoj okazintaj en Hamburgo rande de manifestacioj kontraŭ la pintkunveno de la G20, Bild publikigis titolpaĝe la fotojn de individuoj partoprenintaj en la tumultoj, iliaj vizaĝoj grandigitaj en kadro kun teksto. Diklitera titolo: “Serĉataj! Kiu konas tiujn krimulojn de la G20? Komuniku viajn informojn al la plej proksima polico-posteno”. La portretaro kaj la alvoko al atestantoj estas daŭrigataj en la internaj paĝoj, akompanate de promeso je anonimeco de la denuncantoj. Poste, la rekompenco: Sub la firmaa signo de la gazeto, ĉirkaŭata de rubando “Solidareco kun la polico”, la leganto malkovras la plenpaĝan afiŝon de infaneto streĉante floron al kontaŭribela policano, kun la titolo: “Dankon, polico!”

Tio estas nur komenco. Sekvatage (la 11-an de julio), Bild triumfas: ŝtonĵetanto denuncita titolpaĝe kun maskita vizaĝo, liveris sin al la instancoj. La grupo Axel Springer, proprietulo de la ĵurnalo, lanĉis senprecedencan operacion: “Helpu la policistojn!”, trumpetas la ĉeftitolo. “Ili senlace batalis, sed kelkfoje havis nenian ŝancon fronte al la agresemaj krimuloj: preskaŭ kvincent policistoj estis vunditaj ĉe la interveno dum la pintkunveno de G20 en Hamburgo. Hodiaŭ, Bild kaj la sindikato de la polico volas helpi tiujn funkciulojn — kune kun vi! Ĉu vi deziras subteni la vunditajn policistojn? Sendu viajn donacojn (ĉiu centono valoras!) per transkontigo al la sekva konto, al la ricevanto Axel Springer SE”. La 15-an de julio, la ĵurnalo brustoŝvelas: “Grandan dankon al la legantoj de Bild! Ferioj donitaj al ĉiu policisto vundita dum la G20”.

Tagon antaŭe, en informa retejo, enketo* malkaŝis la krudan trotaksadon de la oficiala nombro de 476 vunditaj policistoj, kiun la komunikiloj de la tuta mondo senkontrole transprenis. Tiu nombro fakte inkludas ĉiujn vundojn kaj malsanojn deklaritajn de la funkciuloj mobilizitaj por la G20 inter la 21-a de junio kaj la 10-a de julio. Sed, se oni konsideras nur la periodon de manifestacioj, de la 6-a ĝis la 9-a de julio, oni nombras jam nur 231 vunditajn policistojn. Multaj inter ili, koncedas la instancoj, estis viktimoj de senakvigo, de sangcirkulaj problemoj aŭ de elmetiĝo al sia propra larmiga gaso. Fine, 455 el la 476 funkciuloj reeklaboris la tagon mem aŭ sekvatage, post rapida surloka prizorgado. Nenia bilanco de vunditaj manifestaciantoj estis publikigita.

Pierre RIMBERT.